Tumanud ponoizukan, komohoingan do tinauh (tinau') Kadazan (toi Dusun) poingizon no haid id BORNEO.
Napadan ngoibu toun do minonguug do Boos Kadazan (toi Dusun). Om intohu kasakag NO do atagak o Boos diti. 75 toun piagahon somok atus ngoibu toun. Osusa monguug, ouhan momozozop.
Kada' do koomit di kinaantakan do nozozop o Parti Politik koiso UPKO sabap nimaan biudo o hongon do huguan Kadazan. Kivaa minamajal dioho.
Au' i' noihaan nung atagak Boos Kadazan. Nga' nung soupama do aantakan iti, AISO MINAMAJAL TUHUN KADAZAN do mamazada' do Boos - om kointutunan - dioho nga ZIOHO sondii.
Dadi, kohivad no daa o tuhun "Kadazandusun" (1995) mantad kaantakan do atagakan do BOOS om KOINTUTUNAN. Sakaakahi' no daa do AU' AANTAKAN ITI!
Nga iisai gia ihia sonsuat do popohombus do miaga diti. Ii no daa ii kivaa ningkokoton ii koontok do popohombus diti. Om nogi, kivaa dati ii au' aanangan do poihoon diti.
Nga' ahansan do kalati ii sinakagon "Kadazandusun" (1995) ii au' po nohodi'. Kivaa dati' dioho do moguang sabap au' koiho om au' kalati' Boos "Kadazandusun" (1995). Om papahasa do mohoing dioho.
Kivaa iso' susuzan noongou ku kokomoi songuhun tanak vagu ii ohodong do mohoing dau sabap au' isido koiho moboos om au' kalati do Boos "Kadazandusun" (1995).
Boos "Kadazandusun" (1995) po-ia'on id sikul sabaagi do "POL" nga' kivaa pinonoizukan toniini' do mongiho nung kakaal ii tanak sikul haid do moboos do "Kadazandusun" (1995). Au' agazo sample dii nga' iso' di noihaan nopo nga' ountob id pahad ginumu' di tuminihombus moboos do Boos "Kadazandusun" (1995).
Nakaatag do koontok kivaa abaabazan ii momoguno do "Kadazandusun" (1995) id kopogiuman do vohos (gaji) doid usin Ringgit.
Copyright © 2023 Miad Sinakagon Au Po Nohodi by Pascalis Claudius Lotinggi Dampian
